Friday, June 16, 2017

වංගුවේ පොඩි කඩේ



මුඩු පොල්තෙල් රහක්
දිවග ගැටෙනා මොහොතක
වංගුවේ පොඩි කඩේ
නිතැතින්ම සිහිවේ මට

පුස් රසැති පොල් ටොපිද
හං වෙච්ච මුරුක්කුද
බුල්ටොද තල කැරලිද
බුලත් දුංකල හැරෙන්නට
වෙන යමක් තිබුනාද
වංගුවේ පොඩි කඩේ

අතේ තිබුනොත් රුපියලක්
මොනාහරි ඕනෙවෙයි මට
ළඟින් යන එන කලට
වංගුවේ පොඩි කඩේ

වැඩි ලකයකුත් නැතිව
වයසක් ජෝඩුවක් හිටිය
දින හතම ඇර තිබූ
වංගුවේ පොඩි කඩේ

හැදෙන කොට අලුත් ගම
පෙරලගෙන රබර් ගස්
තලා දං බෝවිටියා පඳුරු
පොඩි කඩේ විතරක්
ඉතිරි වෙන්නේ කොහොම

Tuesday, May 16, 2017

අපෝ දයා කුග කෝ සමග තවත් පාඩම් මන්ත්‍ර....



විභාග වලට පාඩම් කරන කවුරුන් වුව මුහුණ දෙන බරපතලම ප්‍රශ්නය නම් පාඩම් මතක තබා ගන්නේ කෙසේද යන්නයි. බිලියන ගණනක් වන කරුණු මතක තබා ගෙන විභාගයේ පැය කීපය තුල සියල්ල වැමැරීම ඇත්තටම අසීරු කරුණකි. "දිව අග තියෙනව , අය්යෝ අන්තිම මොහොතෙ අමතක වුනා, හොඳටම මතක තිබිල අමතක වුනා නෙ, ශික්..ඒ පොඩි සීන් එක මතක නැති වුනා නෙ.."  වැනි නාහෙන් ඇඬිලි විභාගයක් අවසානේ අනිවාර්යයනෙ ඇසේ. ආනන්ද හාමුදුරුවන්ට වගේ මතකයක් තිබ්බනම්  අපිත් ගොඩ නේ යනුවෙන් නොහිතපු එකෙක් නැති තරම් ය.

පාඩම් කරන මන්ත්‍ර ඕනෑම විෂයක් තුළ නිර්මාණය වේ. මේ පාඩම් මන්ත්‍ර ඉතා ප්‍රභලය. අදින් වසර 15-20 කට පෙර යොදා ගත් මෙම පාඩම් මන්ත්‍ර අදද මතකයේ පැවතීමෙන්ම මෙම මන්ත්‍ර වල ප්‍රභලතාවය තේරුම් ගත හැකිය.

අපෝ දයා කුග කෝ - ශ්‍රී ලංකාවේ රාජධානීන් මාරු වුන පිළිවෙල (අනුරාධපුර, පොළොන්නරුව, දඹදෙනිය, යාපහුව, කුරුණෑගල, ගම්පල, කෝට්ටේ..)

සක සයින් බක කොස් සබ ටෑං - ත්‍රිකෝණ මිතිය

ආවර්තිතා වගුවටම මන්ත්‍ර සෑහෙන්න තිබුනි. මේ එයින් කිහිපයක්

හන්දියෙ ලිසියා නාන කොට රුබියා කැස්සා පස්සෙන් - 1 ඛාණ්ඩය
බෙම් කැස්බරා - 2 ඛාණ්ඩය
බෝතලේ ඇලී ගැලී ඉන්නා තැලී - 3 ඛාණ්ඩය
කසීගෙ සේලෙ - 4 ඛාණ්ඩය
(5 වෙනි ඛාණ්ඩෙටත් මන්ත්‍රයක් විය. එය මෙහි පළ නොවේ )
ඔන්න සමන් සෙල්ලමට තේ පොවනව- 6 ඛාණ්ඩය

මතකව විදිහට ඔන්න ඔහොමයි. තව සෑහෙන්න තිබේ.


සරස්වතී මන්ත්‍ර, ගණ දෙවි මන්ත්‍ර වගේ බහුබූත වලට වඩා පාඩම් කරන්න කට්ට කන නිර්මාණශීලී සිසු සිවියන්ගේ මෙවැනි ක්‍රම ඇත්තටම ප්‍රයෝජනවත්ය. පොඩි පොඩි ගල් අච්චු කොපි කිරීම් මිසක් මම නම් ඤාණ පටි ගැසීමට නම් එතරම් දක්ෂයෙක් නොවෙමි.. තනිකරම ඤාණ පටිවලින්ම ගොඩ යන අතිදක්ෂයන් ගැන අසා ඇත්තෙමි. උන් අද උසස් රැකියා කරමින් යෙහෙන් වැජඹේ. ඉතින් මොකෝ? එකටත් දක්ෂකමක් තිබිය යුතුය. 






Saturday, May 6, 2017

කව්බෝයි උණ

මට කව්බෝයි උණ වැලඳී දැන් අවුරුදු 20ක් පමන වෙයි.  මා පාසැලේ 8 හෝ 9 වසරේ කාලයේ මගේ පියා ගෙනත් දුන් "ෂේන් (Jack Schaefer) "  කියවූ දා පටන් මේ කව්බෝයි උණ තවමත් සුව වී නැත. මෙහි පරිවර්තනය සිරිල් සී පෙරේරා ගෙනි. බටහිර මිටියාවතට හුදෙකලාවේ එන අද්භූත ගොපලු චරිතය මගේ සිත වසඟ කර ගත්තේය. පොත මේ වනවිට 10-15 සැරයක් කියවා කට පාඩම් වී ඇති සෙයකි. ඉන්පසු මගේ සිත් ගත් පොත "ගොපලු රජා" ය. අසුරු සැනින් වෙඩි තබන අසම සම වෙඩික්කරු බක් ඩූන් ගේ වීර ක්‍රියා ඇතුලත් එම පොත ද මම 10-12 වතාවක් කියවා ඇත්තෙමි.

\
 ෂේන් චිත්‍රපටයෙන්


කව්බෝයි වීමට අත්‍යාවශ්‍ය වන පිස්තෝලයක් නම් මට රුපියල් 50ක් 100ක් වැනි මුදලකට  මිලදී ගත හැකි විය. කව්බෝයි තොප්පිය වෙනුවට ආදේශකයක් සොයා ගැනීමට හැකිවිය. පිස්තෝල කොපුව,පතොරොම් පටිය ආදී සියල්ල කාඩ්බෝඩ් සහ පරන ඉනපටි ආදියෙන් මට ගෙදරදීම සාදා ගත හැකිවිය.බලවත්ම ප්‍රශ්නය අශ්වයාය. අශ්වයෙක් ඇතිකිරීමට තරම් මට වත්කමක් නොවීය , එකල. එබැවින් අශ්වයා නොමැතිව පයින්ම මම කව්බෝයි ජීවිතය ගෙව්වෙමි.

කව්බෝයි චිත්‍රපට බැලීමේ ආසාවද එපරිද්දෙන්ම ඉස්මුරුත්තටම නැග තිබිනි. ඩොලර්ස් චිත්‍රපට මාලාවට අමතරව සිල්වරාඩෝ මගේ ප්‍රියතම චිත්‍රපටයක් විය. ඊට අමතරව බ්‍රිස්කෝ කවුන්ට් ජූනියර් රූපවාහිනී කතා මාලාවද මම නොවැරදීම බැලීමි.
ක්ෂිණික වෙඩි පහරකින් පසු වට කීපයක් කරකවා අසුරු සැනින් පිස්තෝලය කොපුවේ දමා ගන්නා දර්ශනය කවදත් මගේ සිත් ගත්තේය. මා අත තිබූ ප්ලාස්ටික් පිස්තෝලෙන් මේ වැඩ කිඩ දැමීමට මම බොහෝ උත්සාහ දැරීමි. කව්බෝයිලා ඇමෙරිකාවේ තාමත් ඉන්නවද? තාමත් පිස්තෝල එල්ලන්  යනවද? මෙයාකාරයේ ප්‍රශ්නද  එකල මා සිත තුල විය.

ෂේන්  ජෝ ස්ටාරට් ගේ වත්තේ පැරණි මුලක් ගලවයි. මමද එලෙස අපේ වත්තේ උදුරා දමා තිබූ පොල් මුලක් මහත් වෑයමෙන් තනිවම කපා කොටා ඉවත් කර දැමුවෙමි. එය මට මහත් ජය ග්‍රහණයක් විය. උදුනේ සෑදූ විස්කෝතුද ඇපල් පුඩිං ද සාදා දෙන්නට මාරියන් කෙනෙක් නැති නිසා අම්මා විසින් ප්ලේන්ටියක් ද බටර් පාන් පෙති කීපයක්ද ලබා දුන් බව මතකය.

 Django, Quick and Dead මෑත කාලයේ මා බැලූ කව්බෝයි චිත්‍රපට වෙයි.  වසර විස්සක් පමණ ගත වුවද අදටත් මගේ කව්බෝයි උණ හොඳවී නොමැත.එය හොඳවෙන සේයාවක්ද නොමැත. දකුණු අතේ මැණික් කටුවට ආසන්නයෙන් පිස්තෝලයක් එල්ලාගෙන අශ්වයන්ට සන් කරන කොකු යෙදූ පාවහන් පැළඳ බටහිර මිටියාවතේ සැරි සරමින් අපරාධකරුවන් දඩයම් කිරීමට මට ලබන ආත්මයේ හෝ ඉඩක් ලැබේවායයි පතමි.

Thursday, March 30, 2017

අර ගැඹුරු චිත්‍රය



ලස්සනට අස්කරන්
පිළිවෙලට තියාගෙන
ඉන්නට මටත් ඕනැ විය

ඒ මගේ සිරි නිවස
මගේ සිහිනය

වැලි ගෙනත් දමන කොට පුංචි පුතු
හොඳින් අතු ගෑ සාලයේ
ඉවසං හිටියා මමත්
නොඉඳම බැරි කමට

සති අන්ත ශ්‍රමදාන
එස් පහට අමතරව
තව තවත් ක්‍රමවේද
ගේ ලස්සනට තියා ගන්න
ඒ මගේ සිහිනය
මගේ සිරි නිවස

මහ ගැඹුරු චිත්‍රයක්
එල්ලගෙන සාලෙ මැද
ගැඹුරුම නිහඬතාවයක
දැහැනකට සමවදින්න
ඒ මගේ සිහිනය...

කොතෙක් කල් ගතවුනිද....
කොතෙක් දේ සිදුවුනිද.....

දැන් හරිම පිළිවෙලයි
පිරිසිඳුය සංසුන්ය
හැදි කරන්නට කෙනෙක් නැත
මේ නිහඬ ජීවිතය

බොඳවගිය දෑසින්
වීදුරු දෙනෙත විනිවිද
තනිව රසවිඳිමි මම
අර ගැඹුරු චිත්‍රය

Tuesday, February 21, 2017

චන්දරේ ගේ පොඩි පුතා




ත්‍රීවීල් චන්දරේ ගේ පොඩි පුතා
ත්‍රීවීල් එකටමලු ආදරේ

ගෙනැවිත් දුන්නට කොච්චර
කාර් ලොරි ටිපර් නැව් හිටං
ත්‍රීවීල් එකටමයි ආදරේ

තහඩු කෑල්ලෙන් නිමවා
උලා ඇති රතු නිල් ලැකර්
ගොඩේ පෙනුමැති ආටාවටයි
කොයි වෙලාවෙත් කැමතිම

තාත්තාගෙම පුතා නෙව
කවදහරි ඉතින් පිය උරුමය
බැඳගෙන රීප්ප කෑල්ලක් පුටුවක
අදිනවා උඩට ලීවරය

ප්රාඩෝ මොන්ටේරො බෙන්ස් 
තියෙද්දිත් මෙච්චර හැම තැන
තහඩු කෑල්ලෙන් ගැසූ ආටාව
විතරමද මේකට සෙල්ලමට

හයර් නැති වූ දවසක
ඇවිදින් චන්දරේ ගෙදර
විසි කලා ආටාව කැලේට
හැප්පුනු නිසා කකුලක

චන්නදරේ ගේ පොඩි එකා
හෙව්වාලු ආටාව ගේ පුරා
හරියට දුක් වෙමින් චන්දරෙත්
හෙව්වාලු ආටාව ගේ පුරා

Sunday, February 28, 2016

මිය ගිය කවියාට....


මිතුර, පෙනෙනවාද නුඹට
මඳක් එපිටින් අතුපතර විදා ගත්
සුවිසල් නුග රුක
නුඹ අවට සොහොන් මත
වියළී යන මල් පොකුරු

කෙසේ මග හැරෙන්නද?
ලා හිරු කිරණ,
සැඳෑ අහස් කුස,
හිරු මියෙන මුහුද,
වියළී ගිය තුරු පතක් වුව
මගහැරුනාද?

මේ සියලු වස්තුව නුඹගේය
ඉතින් මම ආපසු යමි
කිසිවෙක් නොවැලලුනු
හිස් බිම් කඩක් ඉතිරිව ඇත
මොහොතකට එහි නතර වෙමි
මිනිසෙකුට සැබැවින්ම
මෙපමනක් නොසෑහේ ද?

Monday, November 9, 2015

හිම කුමරිය මිය ගිහිල්ල








හිම කුමරිය මිය ගිහිල්ල
මිය ගිහිල්ල?
හැබෑවටම මිය ගිහිල්ල
ඉරිද පොළේ මුල්ලෙ කොටුවෙ
ඇපල් ගොඩයි දොඩම් ගොඩයි
අතර මැද්දෙ වැටිල හිටිය

යුද්දෙට ගිය කුමාරයා
ගෙදර ආවෙ පෙට්ටියකින්
මාළිගාවෙ දොර වහලා
දරු දෙන්නත් කර පින්නන්
හිමකුමාරි ගමට ආව

ඉරිද පොළේ මුල්ල කොටුව
අඩු ගාණට අරන් දුන්න
සූකරයත් ණය ඉල්ලන්
රෑට රෑට ගෙට රිංගුව

පොලෝසියෙන් කියන පරිදි
දිවි නහගත් තව එකියක්
“ඇගේ අතින් වස දාගෙන
ඇයම කාල ඇපල් ගෙඩිය”

දරු දෙන්නත් කර පින්නන්
ගමට ආව හිම කුමරිය
අන්තිමේදි මිය ගිහිල්ල
දිවි නහගෙන මිය ගිහිල්ල

සිතුවම - Liese Chavez